Eyni yolu qazıb bu vəziyyətdə qoyub getdilər; təhlükə yarandı – ŞİKAYƏT - VİDEO

Bakının Binəqədi rayonnunda yolun ortasında qazılmış çuxur sürücülər üçün ciddi manelər yaradır. Sakinlərin sözlərinə görə, xüsusilə gecə saatlarında həmin çuxur işıqlandırmanın zəif olması səbəbindən sürücülər üçün real təhlükə mənbəyinə çevrilir. Avtobus sürücüləri isə daha böyük risklə üzləşirlər, çünki çuxur nəqliyyat vasitələrinin manevr imkanlarını məhdudlaşdırır və qəza ehtimalını artırır.

Bununla əlaqədar təlimçi Arzu Babazadə Avtosfer.az-a ərazidən video çəkərək göndərib. O qeyd edib ki, Azərbaycan Beynəlxalq Universitetdən “Dərnəgül” Nəqliyyat Mübadilə Mərkəzinə gedən yolda, İlham Hacıyev küçəsindəki bu çuxuru daha əvvəl də qazmışdılar. Bir müddət əvvəl də eyni yerdə analoji şəkildə yol qazılmış, məsələ ictimailəşdirildikdən sonra yol bərpa edilmişdi. Lakin yenidən həmin nöqtədə qazıntı aparılıb və yol əvvəlki vəziyyətinə qaytarılmayıb.

Sakinlər məsələ ilə bağlı aidiyyəti qurumların tədbir görməsini, çuxurun təcili doldurularaq yolun bərpasını tələb edirlər.

Eltac Zülfüqaroğlu