Psixoloqlar depressiyanın yeni növünü müəyyən ediblər

Oyunçuların gizli sindromu olan "Oyun sonrası depressiya" (P-GD) elmi olaraq sübut edilib. Avtosfer.az Milli.az-a istinadən xəbər verir ki, Varşava Universitetinin (SWPS) psixoloqları tərəfindən aparılan araşdırma, onlayn forumlarda uzun müddətdir müzakirə edilən, lakin elmin bu günə qədər qulaq ardı etdiyi hadisəni təsvir edib - Post-Game Depression (P-GD). Məlum olub ki, yüzlərlə saat davam edən və oyunçunu özünə çəkən bir video oyunu bitirmək, insan zihnində ölçülə bilən bir emosional boşluq və ayrılıq hüznü yaradır.

P-GD (Oyun Sonrası Depressiya) nədir?
Araşdırmanın rəhbəri, psixoloq Kamil Yanoviç bildirir ki, oyunlar artıq sadə əyləncə deyil, nəhəng hekayələr təqdim edən mürəkkəb virtual reallıqlardır. Oyunun bitiş titrləri ilə birlikdə gələn və insanı taqətdən salan o boşluq hissi artıq rəsmi olaraq P-GD adlandırılır.

373 oyunçu üzərində aparılan araşdırma bu sindromun 4 əsas əlamətini üzə çıxarıb:

Düşüncələrin daim bitmiş oyunun dünyasına, süjetinə və personajlarına qayıtması.

Böyük bir macəranın bitməsinin gətirdiyi ağır "sonlanma" psixologiyası.

Oyundan qopa bilməmək hissi ilə onu dərhal yenidən başlamaq ehtiyacı.

Yaşanan güclü emosional doyumluluqdan sonra digər filmlərdən, kitablardan və ya yeni oyunlardan zövq ala bilməmək.

Araşdırmanın ən diqqətçəkən nəticələrindən biri budur ki, bu sindrom ən çox RPG (Rol Oyunları) həvəskarları arasında yayılıb. Psixoloqlar bunu oyunçunun virtual dünyadakı personajın inkişafında birbaşa seçim sahibi olması və onunla qurduğu sarsılmaz bağ ilə izah edirlər. "Oyunçular bu dünyalara sanki ekzotik bir tətildəymiş kimi aşiq olurlar və oyun bitdikdə öz 'darıxdırıcı' reallıqlarına (vətənlərinə) qayıtmaqda çətinlik çəkirlər".

Tədqiqatçılar xəbərdarlıq edirlər ki, P-GD klinik depressiya qədər dağıdıcı olmasa da, onu yüngülə almaq olmaz. Tapıntılar göstərir ki, oyunu bitirdikdən sonra ən ağır kədər yaşayan şəxslər, adətən real həyatda da dünyaya daha bədbin baxan və duyğularını idarə etməkdə çətinlik çəkən insanlardır. Bu da P-GD-nin aşağı həyat keyfiyyəti və yüngül depressiv əlamətlərlə birbaşa əlaqəli ola biləcəyinə işarə edir.