Sakinləri çıxılmaz vəziyyətə salan yol – Bu cür yaşayış olmaz - VİDEO

İmişli şəhərinin 1 200 nəfərdən çox sakini olan Hüseyn Cavid küçəsi tamamilə yararsız vəziyyətdədir. Avtosfer.az xəbər verir ki, sakinlər illərdir aidiyyəti qurumlara etdikləri müraciətlərin cavabsız qaldığını bildiriblər. "Yolumuz bərbad vəziyyətdədir. Maşınlar da məhv olur. Taksi çağıranda gəlmək istəmirlər, etiraz edirlər. Bu cür yaşayış olmaz. Küçə məhv olub, burada yaxşı balıq tutmaq olar", - sakinlərdən biri bildirib. "Məktəbə, işə gedib-gəlməyə gəmi lazımdır. Su dizə kimi çıxıb, belə şey olmaz. Kanalizasiyanı qazıb üstünü basdırdılar, qaldı tör-töküntü. Bəs biz adam deyilik?!" - başqa bir sakin qeyd edib. Məsələ ilə bağlı İmişli Rayon İcra Hakimiyyətindən bildirilib ki, cari ildə sözügedən küçədə əsaslı təmir işlərinin aparılması nəzərdə tutulub.