"Yalançı çərşənbə" niyə belə adlanır? - AÇIQLAMA

Bu gün yalancı çərşənbədir. Novruz bayramına aparan yolda xalqımızın qədim inancları və adət-ənənələri ilə bağlı olan bu gün müxtəlif bölgələrimizdə xüsusi şəkildə qeyd olunur.

Bəs bu, niyə yalançı çərşənbə adlanır? 

Avtosfer.az xəbər verir ki, mövzu ilə bağlı Redaktor.az-a açıqlama verən AMEA Folklor İnstitutunun şöbə müdiri, filoloq və tədqiqatçı Ağaverdi Xəlilov bildirdi ki, bölgələrimizə görə çərşənbələrin sayı müxtəlifdir və keçirilmə qaydalarında da tarixən rəngarənglik olub:

"Bəzi bölgələrimizdə 5, yaxud 6-7 çərşənbə keçirilib. Hal-hazırda, düzdür, məsələn, 5 və ya 7 çərşənbə qeyd olunmur, amma bunların izləri qalıb. Məsələn, indi son dövrlərdə çərşənbələrin qeyd olunması xüsusi olaraq dörd çərşənbə üzərində sabitləşib. Amma bununla bərabər, bəzi bölgələrdə beş çərşənbə keçirmək ənənəsi müəyyən qədər qalıb. Yəni dörd əsas çərşənbədən öncə bir çərşənbə də olub ki, bu günə təsadüf edən həmin çərşənbəyə “yalançı çərşənbə” deyiblər. Bu əsasən Qarabağ bölgəsində çox yayılan bir adətdir. “Yalançı çərşənbə" əsasən qışın yola salınması və yazın gəlişinə hazırlıq mərhələsi kimi qəbul edilir. Bəzi bölgələrdə insanlar bu gün tonqal qalayır, ev-eşiyi təmizləyir, səməni qoyur və Novruzun yaxınlaşdığını simvolik şəkildə qeyd edirlər. Yəni Novruz bayramına, baharın gəlişinə hələ bir ay qalmışdan hazırlıqlar başlayır. Yəni çərşənbələr artıq bir bayramdır, mövsüm bayramlarıdır və bu bayramlara hazırlaşmaq üçün bəzi bölgələrimizdə ilk olaraq “yalançı çərşənbə” də qeyd edilib".