Bu proqramları telefonunuza yükləməyin! - EKSPERTDƏN XƏBƏRDARLIQ

Günümüzdə bir çox istifadəçilər qeyri-rəsmi saytlardan istifadə edərək telefonlarına tətbiqlər yükləyirlər. Buna səbəb həmin proqramların daha geniş imkanlarının olmasıdır.

Bəs görəsən telefonlarına qeyri-rəsmi saytlardan tətbiqlər yükləyən vətəndaşları hansı problemlər gözləyir ?

Mövzu ilə bağlı Sonxeber.az – a açıqlama verən İT mütəxəssisi Fərhad Mirəliyev bildirib ki, bu tətbiqlər telefonun ələ keçirilməsindən tutmuş, fərdi məlumatların oğurlanmasına qədər bir çox təhlükələrə səbəb ola bilər:

"Qeyri-rəsmi mənbələrdən yüklənən tətbiqlər çox təhlükəli ola bilər. Bir çox hallarda istifadəçilər müəyyən səbəblərdən qeyri-rəsmi mənbələrdən tətbiqlər yükləyirlər. Bu səbəblərdən biri funksionallıqla bağlıdır. Məsələn bir çox istifadəçiləri WhatsApp funksionallığı qane etmir deyə müəyyən saytlardan daha funksional versiyalarını yükləyirlər. Belə ki, WhatsApp-ın öz proqram təminatının instalyasiya faylı ilə daha bir zərərli kodu olan proqram təminatı birləşdirilir və hansısa bir saytda yükləmə üçün əlçatan edilir. Bundan xəbərsiz olan istifadəçi həmin tətbiqi yükləyir və nəticədə WhatsApp-dan başqa digər zərərli proqram təminatı da telefona yüklənmiş olur. Bu zaman telefonda adi rejimdə WhatsApp çalışdığı halda arxa fonda həmin zərərli kod da öz işini görür, fəsadlarını törədir. Bu fəsadlar telefona kənardan müdaxilə etmək, telefonda olan hansısa fərdi məlumatları əldə etmək, telefonu uzaq məsafədən idarə etmək, hətta bank hesablarına müdaxilə etmək və.s -dən ibarətdir.

Bir çox tətbiqlər var ki, ödənişlidir. İstifadəçilər ödəniş etməmək üçün pirat saytlardan bu tətbiqləri yükləyirlər. Bu tətbiqlər telefonun ələ keçirilməsindən tutmuş, fərdi məlumatların oğurlanmasına qədər bir çox təhlükələrə səbəb ola bilər. Buna görə də istifadəçilərə yalnız rəsmi mənbələrdən proqramlar yükləməyi tövsiyyə edirik".