Çindən fantastik təklif: “Asteroidləri raketlə geri çevirək..."

Bunun üçün ilk sınaqda 20-dən çox iri raket göndərilməlidir.
Çin alimləri bəzən Yerə həddən artıq yaxınlaşaraq, iri şəhərlərə düşmək təhlükəsi yaradan asteroidlərin qarşısını almaq üçün yeni üsul təklif edirlər.

Fantastik səslənsə də, tədqiqatçılar nəhəng raketlərdən istifadə etməklə asteroidlərin hərəkət trayektoriyasını dəyişmək və beləliklə də, Yerə düşmək riskini azaltmağı planlaşdırır.

Əslində bu ideya yeni deyil. ABŞ artıq bu ilin sonu, yaxud gələn ilin əvvəlində hazırda Yerə yaxın yerləşən iki asteroidə robot kosmik gəmisini göndərməyə hazırlaşır. Kosmik gəmi asteroidlərin daha kiçik olanın səthinə qəza enişi edərək, onun hərəkət trayektoriyasının nə qədər dəyişəcəyini izləyəcək.

Çin Milli Kosmik Elmi Mərkəzində keçirilən simulyasiya sınaqları isə göstərib ki, Günəşin ətrafında fırlanan, eni 1970-ci ilə qədər dünyanın ən hündür binası olan Nyu-Yorkdakı Empire State Buildingə bərabər (443 metr) Bennu asteroidinin hərəkət istiqamətini dəyişmək üçün 23 ədəd Long March 5 tipli raket lazımdır. Eyni anda partlayan raketlər asteroidin trayektoriyasını Yerin radiusunun (6371 km) 1,4 misli qədər dəyişə bilər.

London İmperial Kollecinin hesablamalarına görə, növbəti 100 il ərzində eni 100 metrdən böyük asteroidlərin Yerə düşmə ehtimalı 1%-dir. Bununla belə, Çinlilər elmi araşdırmaları təcrübədə də yoxlamaq fikrində qətiyyətlidir./marja