Çinlilər Böyük Britaniyanın ən iri çip zavodunu alır

Niderlandda qurulmuş, lakin 100% Çinin Wingtech Technology şirkətinə məxsus çip istehsalçısı Nexperia Böyük Britaniyanın ən iri çip zavodunu alır. Marja Britaniya mətbuatına istinadla xəbər verir ki, Cənubi Uelsdə, Newportda yerləşən zavod üçün Çinlilər 63 milyon funt (87 milyon dollar) ödəyəcək.

Bir sıra ingilis siyasətçiləri və iqtisadi ekspertlər hökumətə müraciət edərək, zavodun bazar qiymətindən çox aşağı təklif olunduğunu bildirib və sövdələşməyə icazə verilməməsini xahiş edib. Müqayisə üçün qeyd edək ki, Texas Instruments şirkəti ötən həftə ABŞ-ın Yuta ştatındakı boş Mikron zavoduna bundan təxminən 10 dəfə baha qiymət - 900 milyon dollar təklif edib.

Qiymətin belə ucuz olmasının səbəbi zavodun 40 milyon funta (55,2 milyon dollar) qədər borcu (o cümlədən HSBC bankına 20 milyon funt) olmasıdır. Çin şirkəti bu fürsətdən yararlanıb sövdələşməni rəsmiləşdirə bilsə, hazırda davam edən qlobal çip böhranı fonunda ciddi bazar payı qazanacaq. Xatırladaq ki, ən iri qlobal çip istehsalçıları Tayvanın TSMC, Cənubi Koreyanın Samsung və Çinin SMIC şirkətləridir. ABŞ-da isə bu sahədə Intel liderlik edir.