Əvvəl toster, indi də smartfon

Yaponiyanın toster istehsalı ilə məşğul olan «Balmuda» şirkəti smartfon bazarına çıxmaq niyyətindədir. 

Hazırda şirkət 5G telefonunun buraxılmasına hazırlaşır, hələlik yeni smartfon barədə məlumat verilmir, bircə məlumdur ki, onun satışlarına 2021-ci ilin noyabrında başlanacaq.  

«Məişət texnikası istehsalı biznesində əldə etdiyimiz təcrübəyə əsaslanaraq, Balmuda üçün yeni olan sürprizləri təqdim etmək istəyirik.  Bu – sürətlə inkişaf edən smartfon bazarına aiddir»-deyə şirkət bildirir.

«Balmuda» smartfonları «Kyocera» şirkətinin dəstəyi ilə istehsal olunacaq. Smartfonlar  ilk mərhələdə Yaponiyanın özündə «SoftBank» operatoru vasitəsilə satılacaq. 

«Balmuda» məişət texnikası – lampalar, hava nəmləndiriciləri, dinamiklər və başqa qurğular istehsal edir. Onun ən populyar məhsulu toster olub – 5 il əvvəl bu qurğu Yaponiyada çox məşhur oldu, alıcılar onu əldə etmək üçün 5 ay gözləyirdilər.