Metropoliten üçün alüminium vaqonlar, yoxsa 70-ci illərə qayıdış

Rusiyada metropoliten üçün alüminium karkaslı vaqonların layihələndirilməsinə başlanılıb.
Avtosfer.az xəbər verir ki, layihənin əsas iştirakçısı qlobal alüminium istehsalçısı Rusal şirkətidir.
Plana görə vaqonların əksər xarici detalları alüminium və onun ərintilərindən hazırlanmalıdır. Bunun nəticəsində hər vaqon azı 2 ton yüngülləşəcək, enerji sərfiyyatı və relslərin aşınması azalacaq.
Alüminium vaqonların istismar müddətinin 45 il, yəni indiki vaqonlardan 10 il çox olması nəzərdə tutulur. Ən əsası isə, bu texnika istismardan sonra tam utilizasiya oluna biləcək.
Əslində bu məsələ Rusiya üçün yenilik deyil. Keçmiş SSRİ-də 1973-1985-ci illərdə təxminən bir neçə belə qatar (İ seriyası) hazırlanıb istismara buraxılmışdı. Layihə özünü doğrultsa da, 2 səbəbdən istehsala tətbiq etmək mümkün olmadı: 1. Texnoloji imkanlar məhdud idi (bunun üçün vakum qaynağı tələb edilirdi). 2. Yanğın təhlükəsizliyi problemi vardı.
Bu dəfə isə qaynaq əvəzinə xüsusi yapışqan və pərçimdən istifadə nəzərdə tutulur. Rusal şirkətinin məqsədi daxili bazarda alüminiuma tələbatı yüksəltməkdir.
Layihə uğurlu alınarsa vaqonların MDB ölkələrinə də satılması istisna edilmir. Çünki keçmiş sovet məkanında bütün metropolitenlər Moskva sistemi əsasında qurulub.

Vüqar