"Starship"in ilk orbital uçuşunun nə zaman keçiriləcəyi məlum olub

SpaceX şirkətinin prezidenti Gwynne Shotwell Starship kosmik gəmisinin prototipinin ilk orbital uçuşunun təqribi zamanını açıqlayıb. Qeyd etmək lazımdır ki, kosmik gəminin ilk orbital uçuşu əslində may ayında planlaşdırılırdı. Lakin bəzi texniki problemlər səbəbilə şirkət həmin uçuşu təxirə salmalı olmuşdu. Jurnalistlərə müsahibə verən zaman Gwynne Shotwell bildirib ki, əgər hər şey plan üzrə getsə, Starship kosmik gəmisinin ilk orbital uçuşu artıq gələn ay baş tutacaq.

Bununla belə Falcon 9 raketində olduğu kimi Starship-in də sürətləndirici bloku çox istifadəli olacaq. Plana əsasən ilk orbital uçuş çərçivəsində sürətləndirici blok kosmik gəmidən ayrılacaq və Meksika körfəzi ərazisində sahildən 32 km uzaqlıqda suya düşəcək. SpaceX mühəndislərinin hesablamalarına əsasən Starship öz növbəsində Yer kürəsinin orbiti üzrə 90 dəqiqə ərzində uçuşda olacaq. Əgər sözügedən test uçuşu uğurla yekunlaşsa, kosmik gəmi Yer kürəsini tam dövr edə biləcək.

“Ümid edirəm ki, bizdə hər şey alınacaq. Hər halda biz bilirik ki, bu, çox çətin mərhələdir. Biz həqiqətən də bu sistemin ilk orbital uçuşuna cəhd göstərmək addımına çox yaxınıq” - deyə Gwynne Shotwell bildirib. SpaceX-in planlaşdırdığı bu uçuş Starship-in Yer kürəsi üzrə ilk orbital uçuşu olacaq. Qeyd etmək lazımdır ki, daha öncə şirkət dəfələrlə Staship prototiplərinin uçuş testlərini keçirdib və onların əksəriyyəti uğursuzluqla nəticələnib./technote