Texnologiyada inqilab: Elektromobil akkumulyatorları daha dözümlü olacaq - FOTO

Çin alimləri elektromobillər üçün inqilabi hesab edilən alüminium-ion batareya hazırlayıblar. Yeni batareya litium batareyalardan 10 dəfə daha sürətli dolur və 10 min doldurulmadan sonra belə tutumunun cəmi 1%-ni itirir.

Avtosfer.az xəbər verir ki, bu texnologiya sayəsində elektromobil akkumulyatorlarının ömrü bir neçə milyon kilometrə çata bilər. Tədqiqatçılar istehsal prosesində maye alüminium xlorid əvəzinə bərk elektrolitdən istifadə edildiyini bildiriblər. Layihəyə rəhbərlik edən professor Vey Vanq və komandası elektroliti bərkitmək üçün alüminium flüorid duzundan istifadə ediblər. Bundan əlavə, elektrod səthləri flüoretilen karbonatla örtülüb ki, bu da alüminiumun kristallaşmasının qarşısını alır.

Mütəxəssislər qeyd edirlər ki, batareyanın fiziki və istilik dayanıqlığı artırılıb. O, iti cisimlərlə deşilmə və 200 dərəcə Selsi temperatur kimi ekstremal şərtlərə tab gətirə bilir.

Bundan əlavə, alüminium-ion texnologiyası litium, kobalt və ya nikellə müqayisədə daha ucuz və əlçatan materiallardan hazırlanır. Yeni batareyaların təkrar emalı da daha asan olacaq, bu da istehsalın daha ekoloji və davamlı olmasına imkan yaradacaq.

Ekspertlər yaxın illərdə avtomobil sənayesində bu texnologiyanın geniş tətbiq olunacağını proqnozlaşdırırlar.

Eltac Zülfüqaroğlu