Türkiyədə musiqili yol çəkildi - VİDEO

Türkiyənin nəqliyyat və infrastruktur naziri Əbdülqədir Uraloğlu musiqili yol layihəsinin həyata keçirildiyini bildirib.

Avtosfer.az xəbər verir ki, stabil sürətlə hərəkət edən avtomobillərdə Motsartın "Türk marşı" eşidiləcək.

Nazir melodiyalı yol tətbiqinin Türkiyədə ilk dəfə Ankaranın Nallıhan rayonunda reallaşdırıldığını bildirib.

Uraloğlu tətbiqin yol səthinə müəyyən aralıqlarla yerləşdirilən işarələmələr və ya oyuqlar vasitəsilə avtomobillərin keçidi zamanı yaranan titrəmə və səs çıxarma prinsipi əsasında qurulduğunu qeyd edib.

"Bu oyuqlar və ya işarələmələr avtomobillər müəyyən bir sürətlə keçdikdə musiqili bir melodiya yaradacaq şəkildə dizayn edilib. Səthdəki hər bir oyuq və ya işarələmə fərqli tezlikdə bir not verəcək. Sürücü sabit sürətlə hərəkət etdikdə yaranan titrəmə və səslər birləşərək nəzərdə tutulan melodiyanın eşidilməsini təmin edir," - deyə nazir bildirib.