“WhatsApp”dan yeni funksiya – Qruplar üçün səsli mesaj

“WhatsApp” artıq 33 nəfərlik qruplar üçün səsli söhbətlərə malikdir. 

Şirkət böyük qruplar üçün səsli söhbətin istifadəyə verildiyini elan edib. Yenilik istifadəçilərə çoxlu sayda həmsöhbətlə real vaxt rejimində səsli mesaj mübadiləsi aparmağa imkan verəcək. 

“WhatsApp”da səsli söhbətlər “Clubhouse”, “Telegram”, “Discord” və “Slack”də oxşar xidmətlər prinsipi ilə işləyir. Səsli ünsiyyətə başlamaq üçün kiməsə zəng etmək və ya cavab gözləmək lazım deyil. Bunun üçün sadəcə ekranın yuxarısındakı xüsusi düyməni sıxıb söhbətə qoşulun. 

İstifadəçilər istədikləri vaxtda mikrofonu yandırıb-söndürə, söhbəti tərk edə və ya geri qayıda, zəngi kəsmədən eyni çatda mətn mesajları yaza bilərlər. 

Qeyd olunur ki, səsli çatlar başdan-ayağa şifrələmə ilə qorunur və bütün iştirakçılar onları tərk etdikdə və ya bir saat ərzində heç kim söhbətə qoşulmadıqda avtomatik olaraq bağlanır. 

Yenilik tezliklə "WhatsApp" istifadəçiləri üçün gələcək dövr ərzində əlçatan olacaq. 33 nəfərdən 128 nəfərə qədər olan qrupların üzvləri Android və iOS sistemlərində yenilikdən yararlana biləcəklər. (lent.az)