Bakının yeni avtobusları xəttə çıxdı - VİDEO

Bu gündən paytaxt Bakıda yeni avtobuslar istismara veriləcək. Avtosfera.az bu barədə xəbər verir ki, Nəqliyyat Nazirliyinin Dövlət Avtomobil Nəqliyyat İdarəsinin Bakı Regional Şöbəsinin rəis müavini Əmrah Cəfərovun ans-ə verdiyi məlumata görə, yeni avtobusların hələlik yalnız bir xətt üzrə istismara buraxılacağını bildirib. Avtobuslar 65 saylı marşrut xətti üzrə hərəkət edəcəklər. Xəttə çıxarılacaq avtobusların sayı hələlik əllidir. Saylarının artacağı istisna olunmur. Xəttə çıxarılacaq bu yeni avtobuslar sərnişinlərin rahat gəliş gedişinə hesablanıb. Onları köhnələrdən fərqləndirən tək rəngləri yox, həm də bir çox cəhətləridir. Avtobuslar keyfiyyətli oturacaqlar, müvafiq xəbərdaredici siqnallarla təchiz olunub, müşahidə kameraları quraşdırılıb. Sürücülərin oturduğu kabinələr də şüşə qoruyucular ilə fərqlənir. Yeni avtobuslarda əlilliyi olan şəxslər də nəzərə alınıb. Panduslar tək əlilliyi olan şəxslər deyil, eləcə də uşaq arabası ilə olan analara da avtobusa rahat minib enmə imkanı yaradacaq. Avtobusların hər birində əlil arabasının yerləşməsi üçün xüsusi yerlər ayrılıb. Yeni avtobusların yeni sürücüləri də artıq bəllidir. Onlar əsasən təcrübəli sürücülər arasından seçilib və hər biri D kateqoriyasına malikdir.