Heydər Əliyev Beynəlxalq Aeroportu “4 ulduz” dərəcəsinə layiq görüldü

Heydər Əliyev Beynəlxalq Aeroportu “4 ulduz” dərəcəsinə layiq görülüb. Avtosfer.az-ın AzərTAc-a istinadən məlumatına görə, bu barədə “Silk Way Group”un vitse-prezidenti Eldar Hacıyev məlumat verib. O, qeyd edib ki, ilin əvvəlindən etibarən keçirilən iki beynəlxalq auditin nəticələrinə görə, “4 ulduz” dərəcəsinə layiq görülən Heydər Əliyev Beynəlxalq Aeroportu dünyanın 18 ən yüksək reytinqli hava limanları siyahısına daxil olub.

Qeyd edək ki, Heydər Əliyev Beynəlxalq Aeroportunun yeni aerovağzal kompleksi bu il aprelin 23-də Prezident İlham Əliyevin iştirakı ilə açılıb. İldə 6 milyon sərnişin daşıma gücünə malik yeni aerovağzal kompleksinin ümumi sahəsi 65 min kvadratmetrdir. Burada uçuşların təhlükəsizliyini təmin etmək məqsədilə beynəlxalq aviasiyada istifadə olunan ən son elmi-texniki nailiyyətlər tətbiq edilib. Quraşdırılan traplar, eyni zamanda, 13 hava gəmisini, o cümlədən dünyanın ən böyük sərnişin təyyarəsini – “Airbus A 380”ni qəbul edə bilir. Aerovağzalda sərnişinlərə xidmət yüksək tələblər səviyyəsində qurulub. Ən müasir avadanlığın tətbiqi uçuşların təhlükəsizliyinə hərtərəfli imkan yaradır.