Sürücüyə xəbərdarlıq edən sükan

Avtomobil idarə edərkən mobil telefonundan mesaj yazmağa çalışanlar və ya makiyaj edənlər bu xəbərə diqqət yetirsin. Avtosfer.az-ın panoram.az-a istinadən verdiyi  məlumata görə, ABŞ-ın nəhəng avtomobil şirkəti “General Motors” avtomobillərdə inqilab sayılacaq dəyişikliyi həyata keçirir. Belə ki, “General Motors” sürücünün gözlərini izləyən sensorlarla təchiz edilmiş sükanın istehsalına başladığını açıqlayıb. Sürücünün gözünü və baş hərəkətini izləyəcək sensorlar sayəsində avtomobil sürücüyə diqqətinin dağıldığını xəbər verəcək. “General Motors”un tərəfdaşlarından olan Takata firması bu layihə ilə əlaqədar Avstraliyanın “Seeing Machines” sensor texnologiyası şirkəti ilə müqavilə imzalayıb. Müqaviləyə əsasən, “General Motors” 3-5 il ərzində istehsal edəcəyi 500 min avtomobildə bu sensor və xəbərdarlıq sistemini tətbiq edəcək. Sensorlar sürücünün başını və gözünü izləyəcək. Nə zaman sürücü gözünü yoldan ayırsa və güzgülərə baxmasa ona xəbərdarlıq edəcək.