Avtobus dayanacağını zəbt edən sürücüləri yol polisi belə yaxaladı - VİDEO

Paytaxtda yol polisi əməkdaşları avtobus dayanacağını zəbt edən sürücülərə qarşı tədbir keçirib.

Avtosfer.az xəbər verir ki, Yasamal rayonu Abbas Mirzə Şərifzadə küçəsində keçirilən tədbirlər zamanı dayanacağı zəbt edərək avtobusların rahat hərəkətinə mane olan sürücülərlə profilaktik söhbətlər aparılıb. Bu kimi qayda pozuntularının onların həm özləri, həm də digər hərəkət iştirakçılarının rahat hərəkətinə mane olduğu izah edilib. Polis əməkdaşlarının etdiyi xəbərdarlıqlara baxmayaraq, qaydaları pozanlar barəsində qanunamüvafiq tədbir görülüb.

Bakı Şəhər Dövlət Yol Polisi İdarəsinin bölmə rəisi, polis kapitanı Toğrul Nəsirli bildirib ki, dayanacaqda saxlanılan avtomobillərə görə ümumi istifadədə olan nəqliyyat vasitələri, yəni avtobuslar yolun hərəkət zolağında dayanmalı olur: “Bu da sərnişinlərin və piyadaların həyatı üçün təhlükə mənbəyidir. Sürücülərdən tələbimiz odur ki, dayanacaqlarda maşınlarını saxlamasınlar”.

Məhəbbət Tərlanoğlu