Bakıda narkotik təsiri altında yarış keçirən "avtoşlar" tutuldu - FOTO

Nizami rayon Polis İdarəsinin Dövlət Polisi Şöbəsinin əməkdaşları narkotik vasitələrin təsiri altında avtoxuliqanlıq edərək yarış keçirən sürücüləri aşkarlayıb.

Avtosfer.az-ın əldə etdiyi məlumata görə, 77-NL-385 dövlət nömrə nişanlı, "Reno Megan" markalı avtomobilin sürücüsü Kəlbiyev Sadiq Hüseyn oğlu və 77-BJ-415 dövlət nömrə nişanlı, “Toyota Prius” markalı avtomobilin sürücüsü Cəfərli Cabbar İlqar oğlu saxlanılıb.

Sürücülər öz aralarında yarış keçirərərək avtoxuliqanlıq hərəkətləri ediblər. Araşdırma zamanı Sadiq Kəlbiyevin narkotik vasitələrin təsiri altında olduğu müəyyən edilib.

Hər iki sürücü barəsində toplanmış materiallar aidiyyəti üzrə Nizami rayon məhkəməsinə təqdim olunub. Məhkəmənin qərarı ilə Sadiq Kəlbiyev 20, Cabbar Cəfərli isə 15 gün müddətində inzibati qaydada həbs olunub. Hər iki şəxsin sürücülük hüququ 1 il müddətinə məhdudlaşdırılıb.

Nərmin