Yol polisi siqnal verən sürücüləri 30 manat cərimə edəcək - XƏBƏRDARLIQ

"Son zamanlar paytaxt küçələrində intensiv hərəkət müşahidə olunur. Günün pik saatlarında şəhərin mərkəzi küçə və prospektlərində yaranan sıxlıq zamanı sürücülər lüzumsuz olaraq səs siqnallarından istifadə edirlər". Bunu Avtosfer.az-a açıqlamasında Bakı şahər Dövlət Yol Polisi İdarəsinin bölmə rəisi, polis polkovniki Vaqif Əsədov deyib. O, bildirib ki, bu hal ilk olaraq paytaxt sakinlərinin narahatlığı və haqlı narazılığına səbəb olur. "Sürücülərimiz bilməlidir ki, "Yol Hərəkəti Haqqında" qanunun tələbləri çərçivəsində səs sinqnalları yaşayış məntəqələrində yalnız yol-nəqliyyat hadisələrinin qarşısının alınması məqsədi ilə istifadə oluna bilər. Əks təqdirdə bu hal inzibati xəta tərkibi yaradır və sürücülər  İnzibati Xətalar Məcəlləsinin 329.3-cü maddəsinə əsasən cərimə oluna bilərlər. Bir daha sürücülərdən xahiş edirik ki, vətəndaşların hüquqlarının pozulmaması və inzibati məsuliyyətə cəlb olunmamaları üçün bu növ qayda pozuntusu törətməkdən çəkinsinlər."

Qeyd edək ki, bu qayda pozuntusuna görə 30 manat cərimə nəzərdə tutulub. 

Emin