Yol polisi rəisinin qəzaya düşdüyü anın - VİDEOsu üzə çıxdı

Rusiyada Çelyabinsk vilayətinin Yol Polis İdarəsinin rəisi Andrey Xarçızov qəzaya düşüb. Avtosfer.az xəbər verir ki, hadisə Çelyabinsk – Xarluşi avtomagistralının 3-cü kilometrliyində qeydə alınıb. Qəza anı başqa bir avtomobilin videoqeydiyyatı tərəfindən görüntülənib.

Kadrlarda, Andrey Xarçızovun idarə etdiyi gümüşü rəngdə “Toyota Land Cruiser” markalı avtomobilin yolun sol zolağı ilə hərəkət etdiyi və qəfildən yolun sağında xidmət aparan Yol Patrul Xidmətinin əməkdaşlarının yaxınlığında əyləcə basdığı görülür.

Bundan bir neçə saniyə sonra isə arxadan gələn “Nissan X-Trail” “Toyota”ya çırpılır.

Zərbənin təsirindən idarəetmədən  çıxan “Nissan” yol kənarında park edilmiş “Lada”ya dəyir.

Bildirilir ki, hadisə zamanı xəsarət alan olmayıb.

İlkin məlumatlara görə, qəzaya “Nissan”ın sürücüsü səbəb olub.

Faktla bağlı araşdırmalara başlanılıb.

Namiq Musayev