DYP Qaradağda dostunun maşını ilə "avtoş"luq edən şəxsi saxladı – Məhkəmə həbs etdi - VİDEO

Paytaxtın Qaradağ rayonunda yol-hərəkəti qaydalarını kobud şəkildə pozan sürücünün görüntüsü sosial şəbəkədə yayılıb.

Avtosfer.az-ın məlumatına görə, 77-LT-257 dövlət nömrə nişanlı “Tofaş Şahin” markalı avtomobilin sürücüsü yolda riskli manevrlər edərək “şou” göstərib. Kadrdan göründüyü kimi, o, əlverişsiz hava şəraitində əl əyləcini çəkərək döngəyə sərt daxil olub və bu zaman qarşıdan gələn nəqliyyat vasitələrinə təhlükə yaradıb. Eyni zamanda, avtomobilin konstruksiyasına müdaxilə olunduğu da paylaşılan foto və videolarda aydın şəkildə əks olunub.

Yayılan görüntülərlə bağlı Qaradağ Rayon Polis İdarəsinin Dövlət Yol Polisi Şöbəsinin əməkdaşları tərəfindən araşdırma aparılıb. Keçirilən tədbirlər nəticəsində sürücünün Mikayılov Əzizağa Namiq oğlu olduğu müəyyən edilib. Sürücü saxlanıldıqdan sonra aparılan araşdırma zamanı onun sürücülük vəsiqəsi olmadan dostuna məxsus avtomobili idarə etdiyi aşkarlanıb.

Sürücü barəsində İnzibati Xətalar Məcəlləsinin 511.1.3-cü maddəsinə əsasən tərtib olunmuş protokol baxılması üçün Qaradağ Rayon Məhkəməsinə göndərilib.

Məhkəmənin qərarı ilə M.Əzizağa 20 gün inzibati qaydada həbs olunub və onun sürücülük hüququ 1 il müddətinə məhdudlaşdırılıb.

Nərmin