Nazir tıxac yaradan sürücülərlə bağlı tapşırıq verdi – Vətəndaşlar mənzil başına rahat çatmalıdır

Daxili işlər naziri, general-polkovnik Vilayət Eyvazov bu gün Bakı Şəhər Baş Polis İdarəsində 2023-cü ilin yekunlarına həsr olunmuş əməliyyat müşavirəsində tıxacdan və onun səbəblərinin aradan qaldırılmasından danışıb.

Avtosfer.az xəbər verir ki, nazir vətəndaşların mənzil başına rahat və təhlükəsiz çatmaları üçün aidiyyəti orqanlarla birlikdə paytaxtda nəqliyyat sıxlığının və tıxacların qarşısının alınmasının, yolların kənarında qeyri-qanuni saxlanılan və nəqliyyatın normal axınına maneçilik törədən avtomobillərin kənarlaşdırılmasının, eləcə də sərnişindaşıma sahəsində olan nöqsanların aradan qaldırılmasının vacibliyinə toxunub.

General-polkovnik V.Eyvazov həmçinin daxili işlər orqanlarının dövlət qayğısı ilə hərtərəfli əhatə olunduğunu məmnunluqla vurğulayıb. Nazir əmin olduğunu bildirib ki, Baş İdarənin şəxsi heyəti xidməti borcunu, cinayətkarlığa qarşı mübarizədə, ictimai qaydanın və ictimai təhlükəsizliyin təminində üzərinə düşən vəzifələri layiqincə yerinə yetirəcək.

Məhəbbət Tərlanoğlu