Mikroavtobus sürücüsü yol polislərinə sözün əsl mənasında film kimi hadisə yaşadıb. Bu barədə Avtosfer.az-a Baş Dövlət Yol Polisi İdarəsindən məlumat verilib. 90 UD 678 dövlət nömrə nişanlı, “Mercedes sprinter” markalı avtomobilin sürücüsü 1997 təvəllüdlü, Tərtər rayon sakini Kərimli Mətləb Teymur oğlu mikroavtobusa normadan artıq sərnişin götürüb. Qaradağ rayon ərazisində yerləşən stasionar postda YPX əməkdaşlarının saxla işarəsinə tabe olmayıb. Yol boyu qaydaları pozan sürücü Nəvai postunda növbəti dəfə saxlanılmağa cəhd göstərilib. Lakin sürücü növbəti dəfə tabesizlik göstərib. Hətta maşını YPX əməkdaşlarının üzərinə sürüb. Yenidən qaçan sürücünü yol polisləri Kürdəmir rayonu ərazisində saxlamağa müvaffəq olublar. Sürücü aidiyyəti üzrə Kürdəmir rayon polis idarəsinə təhvil verilib. Araşdırma zamanı məlum olub ki, sürücünün müvafiq kateqoriyası yoxdur. Eyni zamanda avtomobil atasına məxsusdur. Sürücü və avtomobilin sahibi barəsində müvafiq protokollar tərtib olunub. Toplanmış materiallar əsasında sürücü məhkəmənin qərarı ilə 7 gün müddətində inzibati qaydada həbs olunub.

Orxan