Qulaqlıqdan istifadə yolda təhlükədir - DYP-dən PİYADALARA ÇAĞIRIŞ - FOTO

Baş Dövlət Yol Polisi İdarəsi yol hərəkətinin bütün iştirakçılarına, xüsusilə piyadalara müraciət edərək qulaqlıqdan istifadənin yaratdığı təhlükələrə diqqət çəkib.

Avtosfer.az xəbər verir ki, bu barədə Baş Dövlət Yol Polisi İdarəsindən (BDYPİ) məlumat verilib.

Bildirilib ki, piyadaların yolu keçərkən qulaqlıqdan istifadə etməsi yol-nəqliyyat hadisəsi riskini əhəmiyyətli dərəcədə artırır. Qulaqlıqdan istifadə zamanı nəqliyyat vasitələrinin səsi vaxtında və aydın eşidilmir, yaxınlaşan avtomobilin təhlükəsi düzgün qiymətləndirilmir və nəticədə reaksiya vermək üçün zəruri vaxt itirilir.

Baş DYP İdarəsi xüsusilə vurğulayır ki, piyada keçidlərində belə diqqətsizlik ağır və arzuolunmaz nəticələrə səbəb ola bilər.

Qurum piyadalara tövsiyə edir ki, yolu keçməzdən əvvəl qulaqlıqları çıxarsınlar, ətraf mühitə tam diqqət yetirsinlər və yol hərəkəti qaydalarına ciddi əməl etsinlər.

Baş Dövlət Yol Polisi İdarəsi bir daha xatırladır ki, yolda təhlükəsizlik hər kəsin məsuliyyətidir.