Hər zaman qeyri-adi geyimləri, fərqli imici və açıqlamaları ilə diqqət mərkəzində olan stilist Samiraldo (Samir Əliyev) polisə salam göndərdiyi üçün üzr istəyib. Avtosfer.az yenisabah.az-a istinadən xəbər verir ki, sosial şəbəkə hesabında görüntülərini paylaşan stilist video vasitəsilə salam göndərdiyi yol polisini tanımadığını deyib: “Bildiyiniz kimi, mən tələbat olan insanam, hər gün məclisdəyəm. Hər gün tanımadığım insanlar yanıma gələrək xahiş edirlər, kiməsə salam göndərirəm, video çəkirəm və s. Amma bu yaxınlarda tanımadığım bir insan gəldi, rica etdi ki, Xaçmaz yol polisinin əməkdaşı Elnuru salamlayım. Mənim bütün polislərə həmişə hörmətim olub, çünki daim bizim keşiyimizdə durub, bizi qoruyublar. Mən bu xahişi böyük məmnuniyyətlə yerinə yetirib, onlara salam göndərdim. Bilsəydim ki, bu qədər söz-söhbət olacaq heç o salamı göndərməzdim. İnanın ki, mən Elnur adlı polisi heç tanımıram, sadəcə məndən xahiş etdilər, mən də Xaçmaz yol polisini salamladım. Əgər nəsə problem yaratmışamsa, buna görə üzrxahlıq edirəm. Mən gün ərzində yüzlərlə insana salam göndərirəm, ona görə üzr istəyirəm”.