Yol polisi piyadalarla bağlı yerində təbliğat işinə başladı - VİDEO

Son günlər piyadaların vurulması ilə nəticələnən yol qəzaları barədə informasiyalar çoxalıb. Bu istiqamətdə təbliğat işi aparılsa da piyada məsuliyyətsizliyi məsələsi hələ də qalmaqdadır.

Bu gün Avtosfer.az saytı və Bakı Şəhər Dövlət Yol Polisi İdarəsinin əməkdaşları şəhər ərazisində maarifləndirici aksiya keçirib. Belə ki, piyada keçidləri olan yerdə yolu təhlükləli şəkildə keçən vətəndaşlarla yerindəcə söhbətlər aparılıb. Onlara bu hərəkətin təhlükəsi izah edilib. Eyni zamanda, bunun inzibati məsuliyyət yaratdığı bildirilib. Aparılan müşahidələrdən belə nəticəyə gəlmək olar ki, piyadalar tərəfindən qayda pozuntuları daha çox elə piyada keçidlərinin yaxınlığında baş verir. Təəssüf ki, piyadavurma hadisələrinin bir qismi də məhz keçidlərin yaxınlığında qeydə alınır.

Bir neçə küçədə aparılan müşahidələr zamanı qayda pozan piyadalar “üzr istəyirəm”, “xəstə yanında gedirəm”, “tələsirəm” kimi bəhanələr gətirməklə öz əməllərinə haqq qazandırmağa çalışıblar.

Bakı Şəhər Dövlət Yol Polisi İdarəsinin şöbə rəisi, polis polkovniki Vaqif Əsədov Avtosfer.az-a bildirib ki, “Yol hərəkəti haqqında” qanunun 40-cı maddəsi piyadaların hüquq və vəzifələri haqqındadır. “Məhz bu müddəalar pozularsa piyadalar məsuliyyətə cəlb olunur. Bu barədə informasiya verməklə məqsədimiz insanları cərimələmək deyil. Əksinə, maarifləndirmə iş aparmaq və proflaktiki tədbirləri genişləndirməkdir.”
Polkovnik bildirib ki, hər bir piyadanın yanında bir yol polisi əməkdaşının xidmət aparması mümkün deyil. “Odur ki, piyadalar özləri məsuliyyətli olmalı və hərəkətlərinə qiymət verməyi bacarmalıdırlar. Unutmayaq ki, bir neçə dəqiqə vaxt sərf edib piyada keçidindən keçməklə həyatınızı xilas etmiş olursunuz. Bir daha piyadaları nizam-intizama dəvət edirik. Sürücü-piyada münasibətlərinin tənzimlənməsində hər kəsə uğurlar arzulattyırıq.”
Vaqif Əsədov onu da əlavə edib ki, yol polisi piyada keçidlərinin yanında xidmətin təşkil edilməsini təmin edir. “Çünki yerlərdə təbliğatın aparılması müsbət nəticələr əldə etməyə imkan versin.”

Orxan Əli