Yol polisi radara düşdü, cərimə başqa sürücüyə göndərildi - FOTO

Qayda pozmadığı halda dəfələrlə cərimələndiyini deyən İlkin adlı şəxs sosial şəbəkə hesabında yenidən paylaşım edib. Avtosfer.az-ın məlumatına görə, İlkin bildirib ki, yol patrul xidməti maşınına məxsus inzibati protokol sürücünün ünvanına göndərilib.

Şikayətçinin iddiasına görə, qayda pozan yol polisinin maşını onun avtomobiliylə oxşar dövlət nömrə nişanına malikdir. Məhz bu səbəbdən oxşar qayda pozuntusu törətməklə bağlı ona cərimə yazılıb. Şikayətçinin göndərdiyi fotoşəkildən də göründüyü kimi, 99-YP-419 dövlət nömrə nişanlı Yol-Patrul Xidməti avtomobili Nəsimi rayonu Füzuli küçəsində sürət həddini aşıb. Lakin cərimə İlkin adlı şəxsin idarə etdiyi “Toyota” markalı 99-MP-419 dövlət nömrə nişanlı avtomobilə yazılıb.

Qeyd edək ki, sürücü bu halla əvvəllər də qarşılaşdığını əlavə edib.

Baş Dövlət Yol Polisi İdarəsinin şöbə rəisi polis polkovnik-leytenantı Rövşən Tağıyev Avtosfer.az-a bildirib ki, texniki səhv artıq aradan qaldırılıb.

Nərmin