Yol polisinin üç yüksək vəzifəli zabiti koronavirusa yoluxdu - Biri deputatın oğludur

Baş Dövlət Yol Polisi İdarəsinin Avtomobillərin Texniki Müayinə Mərkəzinin rəisi Elşad Məmmədov koronavirusa yoluxub. Avtosfer.az oxu.az-a istinadən xəbər verir ki, rəis bir neçə gündür xəstəxanada müalicə alır. Bildirilib ki, mərkəzin əməkdaşları karantinə alınıb.

Qeyd edək ki, Elşad Məmmədov Milli Məclisin deputatı Elman Məmmədovun oğludur. Deputat açıqlamasında məlumatı təsdiq edib: “Üç gündür COVID-19-a yoluxub. Hazırda xəstəxanada müalicəsini davam etdirir”.

Deputat qeyd edib ki, E.Məmmədovla birlikdə yaşamadıqları üçün analiz verməyiblər.

Avtosfer.az-ın əldə etdiyi məlumata görə, Baş DYP İdarəsinin YPX Alayının 7-ci tağımının komandiri, polis mayoru Ürfət Şükürov da bir neçə gündür koronavirusdan müalicə olunur. Postda xidmət zamanı virusa yoluxan komandir Gömrük Hospitalında müalicə olunduqdan sonra evə buraxılıb. Hazırda ev şəraitində müalicə alır.

Bundan başqa, Bakı şəhər DYPİ-nin Növbətçi hissəsinin əməkdaşı olan polis mayoru Fərman Xəlilov da hazırda koronavirusdan müalicə olunur. Bir neçə gündür hospitaldadır.

Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Kamran Əliyev Avtosfer.az-a bildirib ki, DYP əməkdaşları arasında da koronavirusa yoluxma qeydə alınıb: "Hazırda koronavirusa yoluxmuş bəzi əməkdaşlar xəstəxanada müalicə olunur. Sağalıb işə qayıdanlar da var. Polis əməkdaşları mütəmadi olaraq testdən keçirilir".

Qeyd edək ki, Baş Dövlət Yol Polisi İdarəsi Katibliyinin rəisi Natiq Qasımovun həyat yoldaşı, Bakı Slavyan Universitetinin Rus dili kafedrasının müdiri, dosent Könül Qasımova bir neçə gün əvvəl COVİD-19-dan dünyasını dəyişib.

Elmin