Zaqatalada qaydaları pozan sürücü və piyadalar məsuliyyətə cəlb olundu - FOTO

Zaqatala Rayon Polis Şöbəsinin Dövlət Yol Polisi Bölməsinin əməkdaşları yolun piyadalar üçün nəzərdə tutulmayan hissəsindən keçən şəxslərin müəyyən edilərək onların maarifləndirilməsi məqsədilə nəzarət-profilaktik tədbir keçiriblər.

Daxili İşlər Nazirliyinin mətbuat xidmətinin Şəki regional qrupundan Avtosfer.az-a verilən məlumata görə, şəhər ərazisində hərəkətin intensiv olduğu küçə və prospektlərdə keçirilən tədbirlər zamanı mövcud keçidlərdən istifadə etməyərək öz həyatları ilə yanaşı, digər hərəkət iştirakçılarına da ciddi təhlükə yaradan piyadalar saxlanılıb. Onlara yol hərəkətinin təhlükəsizliyi barədə məlumat verilib və qanunvericiliyin tələbləri onlara izah edilib.

Həmçinin, piyada keçidlərində piyadalara yol verməyən və digər yol-hərəkəti qaydalarına riayət etməyən sürücülər də yol polisi əməkdaşları tərəfindən aşkarlanaraq inzibati məsuliyyətə cəlb olunublar.