Azərbaycanda elektrik avtomobillərinin satışına daha bir təkan

“İmprotex Motors” şirkəti gələn ilin yazına qədər elektrik enerjisi ilə işləyən BMW avtomobillərinin satışına başlamağı planlaşdırır. Avtosfer.az “marja”-ya istinadən məlumatına görə, bunu Şirkətin direktoru Həsən İsmayılov bildirib. “Biz 2016-cı ilə qədər satış və texniki xidmət üçün hazırlıq işlərini aparacağıq. Gələn ilin yazından artıq BMW-nin elektromobilləri olan  i3 və i8  modellərini müştərilərə təklif etmək imkanımız olacaq. Hələlik  BMW-nin elektrik enerjisi ilə işləyən modelləri yalnız Avropa bazarında satılır, Çin kimi bazara belə verilmir”,- o deyib.

Həsən İsmayılov qeyd etdi ki, bu avtomobillərin enerji doldurması problem olmayacaq: “GreenCar” elektrik nəqliyyat vasitələrinin satış və xidmət mərkəzinin və IDEA-nın (Ətraf Mühitin Mühafizəsi Naminə Beynəlxalq Dialoq) birgə layihəsi üzrə Bakı şəhərində və magistral yolların bir çoxlarında quraşdırılan enerji doldurma cihazları universaldır.  BMW avtomobilləri üçün də həmin stansiyalardan istifadə etmək olar”.

Qeyd edək ki, “İmprotex Motors” şirkəti BMW, “Rolls-Royce”, “MİNİ”, “Alpina” və BMW motosikllarının Azərbaycanda  rəsmi idxalçısıdır.