“BMW 3.0 CSL Hommage” avtomobili təqdim edildi – FOTO

Dünyanın və Almaniyanın aparıcı avtomobil istehsalçısı “BMW” şirkəti yeni “3.0 CSL Hommage” konseptini təqdim edib. Avtosfer.az fins-ə istinadən verdiyi məlumata görə, yeni modelin təqdimatı “Concorso d’Eleganza Villa d’Este” avtomobil sərgisində baş tutub.

Əfsanəvi “3.0 CSL” modeli kimi dizayn edilən bu model aqressiv görünüşlü ön radiator qəfəsinə, həmçinin, karbon lifli ön splitterə və LED diodları ilə əhatə edilmiş ikili radiator qəfəsinə sahibdir. Avtomobilin arxasına nəzər saldıqda görə bilərik ki, buraya qalın palçıqlıqlar, karbon lifli yan ətəklər və güzgü rolunu oynayan balaca arxa kamera əlavə edilib. Avtomobil həmçinin, dam üzərində və arxada spoylerə, LED tipli arxa fənərlərə, CFRP diffuzora və 21-dyumluq yüngül lehimli disklərə sahib olub. İnteryer dizaynına gəldikdə, buraya 2 ədəd yüngül, idman tipli oturacaqlar daxildir. Sürücü üçün minimal alətlər paneli, unikal sükan və yüngül lehimli pedallar quraşdırılıb. Digər özəlliklərə, karbon lifli karkas və inteqrasiya edilmiş yanğın söndürmə sistemi daxildir. “BMW” avtomobilin texniki göstəriciləri barədə məlumat verməsə də, bəyan edib ki, avtomobildə 6-silindirli “eBoost” texnologiyalı güclü mühərrik quraşdırılacaq.