«Mitsubishi»nin mənası; ləyaqət, məsuliyyət, şəffaflıq

«Mitsubishi» avtomobil markasının da çox zəngin tarixi və onun loqosunun maraqlı mənası var. Bu şirkətin yaradılması 19-cu yüzilliyə gedib çıxır. Avtosfer.az-ın məlumatına görə, şirkətin yaradıcısı Yataro İvasaki olub. O, Tosa ailəsinə (klanına) məxsus gəmiçilik şirkətini alaraq, 1873-cü ildə onu “Mitsubishi” adlandırıb. “Mitsubishi” sözü yaponca “mitsu” (“üç” deməkdir) və «hishi» (“su şabalıdı” deməkdir: yaponlar romb şəkilli almazı belə adlandırırlar) sözlərinin birləşməsidir («hishi» yapon dilində «bishi» kimi tələffüz olunur).

«Mitsubishi»nin şəkildə gördüyünüz loqosu isə şirkətin yaradıcısı olan Yataro İvasakinin öz ailəsinin (klanının) və Tosa ailəsinin (klanının) ailəvi gerblərinin kombinasiyasından yaranmışdır. İvasaki ailəsinin gerbi üç romb, Tosa ailəsinin gerbi isə bir nöqtədən müxtəlif istiqamətlərə çıxan üç palıd yarpağından ibarət idi. Mitsubishinin şəkildə gördüyününz loqorsu 1875-ci ildə yaradılıb və demək olar ki, dəyişikliyə məruz qalmayıb. Loqo özündə üç prinsipi ifadə edir: ləyaqət; cəmiyyət qarşısında məsuliyyət; beynəlxalq əməkdaşlıqda şəffaflıq.

«Mitsubishi» şirkəti avtomobil istehsalına 1917-ci ildə başlamışdır. Həmin vaxt bu nəhəng biznes qurumuna sahiblik edən Kayota İvasaki şirkətin tərkibində “Mitsubishi Motors” adı altında avtomobil konsernini yaradaraq avtomobil istehsalına başlayıb.

Hazırda «Mitsubishi» nəhəng transmilli şirkətdir. Bu şirkət təkcə dünyada məşhur olan avtomobillərin deyil, həm də gəmilərin, müxtəlif elektrotexnikanın istehsalı ilə məşğuldur. Bu şirkətin metallurgiya, neft-kimya, sellüloz-kağız sənayesində, tikintidə və iqtisadiyyatın başqa sahələrində də böyük səriştəsi var.

Fidan