“Toyota” minlərlə maşını geri çağırır

Yaponiyanın avtomobil istehsalçısı “Toyota” şirkəti 1,4 milyon avtomobili geri çağıracaq. Avtosfer.az fins-ə istinadən xəbər verir ki, bu, avtomobillərin təchiz edildiyi yerli “Takata” şirkətinə məxsus təhlükəsizlik yastıqlarında olan problemlə bağlıdır. Məsələ ondadır ki, yastıqlara havanın vurulması sistemi nasaz olduğundan avtomobil hərəkət edərkən yastıq dağıla, sürücü və ya qabaq oturacaqda əyləşən sərnişin zədə ala bilər.

“Takata”nın istehsal etdiyi təhlükəsizlik yastıqlarına görə 2008-ci ildən bəri ümumilikdə 25 milyon avtomobil geri çağırılıb. Onların arasında “Mazda”, “Honda”, “Nissan”, “Toyota”, “BMW”, “General Motors”, “Ford”, “Chrysler”, “Mitsubishi” və “Subaru” kimi markalar var. Ən çox "Honda" avtomobilləri geri çağırılıb - 14 milyon ədəd. Bu illər ərzində təhlükəsizlik yastıqlarının partlaması nəticəsində yaranan metal qırıntılarından 6 nəfər həlak olub. Bundan başqa, daha 100 nəfər yaralanıb.