"Volkswagen" milyardlar itirəcək

Almaniyanın “Volkswagen” avtokonserninin üç aydakı itkiləri 15 illik dövr ərzində ən iri məbləğə çatıb. Bu itkilərə “dəm qazı” qalmaqalı səbəbindən yaranan 6,7 milyard avroluq gecikmələr səbəb olub. Keçən ilin üçüncü kvartalında 3,23 milyard avro qazanc əldə edən “Volkswagen” qrupu bu ilin eyni dövründə 3,48 milyard avro zərərə düşüb. Konserndə brendin nüfuzuna məsul olan Qerbert Diss Tokioda təşkil olunmuş avtosalonda çıxış edərkən istifadəçiləri sakitləşdirməyə çalışıb: “Müştərilərimizin etimadı bizim əsas nailiyyətimizdir. Markamızın və keyfiyyətli məhsulumuzun etimadını geri qaytarmaq üçün əlimizdən gələn hər şeyi edirik. Bu məqsədlə insidentlə bağlı bütün həqiqətləri üzə çıxararaq ictimaiyyətə təqdim edəcəyik. Eyni zamanda, çalışacağıq ki, oxşar hadisələr bir daha təkrarlanmasın”. Ekspertlərin hesablamalarına görə, yaranmış qalmaqal səbəbindən konsernin yekun itkiləri 30 milyard avroya çata bilər. Belə ki, şirkəti yeni cərimə sanksiyaları və dünyanın bir çox ölkəsində kollektiv məhkəmə iddiaları gözləyir. Bütün bu problemlərin öhdəsindən gəlmək üçün “Volkswagen” öz ehtiyatlarını xərcləməyə və məsrəflərin azaldılması proqramına başlamalıdır.