Azərbaycanda "Kamaz" sürücülərindən sükan arxasında ŞOK ƏMƏL - VİDEO

Yollarımızda yük avtomobillərinin iştirakı ilə baş verən ağır yol qəzaları deyəsən, bəzi sürücülərə dərs olmur. Onların bəziləri ağır tonnajlı nəqliyyat vasitəsini idarə etdiyini unudur və sükan arxasında diqqəti yayındıran hərəkətlər edirlər. Mobil telefondan istifadə edən bu sürücülər hətta sosial-şəbəkələrdən də canlı olaraq istifadə edib "tik-tok" çəkirlər. Onlardan biri “Kamaz” markalı, 55 BE 285 dövlət nömrə nişanlı yük avtomobilinin sürücüsüdür. Bu sürücü sükan arxasında təhlükəsizlik kəmərindən istifadə etmir, özünü yolda yox, kino səhnəsində hiss edir və gözü yoldan çox telefona baxır.
66 BE 636 dövlət nömrə nişanlı "Kamaz"ı idarə edən Rəşad adlı sürücü də kəməri taxmayıb və sükan arxasında şou göstərir. 
Azər İlqaroğlu adlı sürücü isə 99 DX 151 dövlət nömrə nişanlı “DAF” markalı yük avtomobilini idarə edir. O, canlı yayımda hətta ayağının birini qaldırmaqla özünü qorxusuz, peşəkar sürücü kimi göstərir, digər videoda isə əlində telefon tutaraq yolboyu çəkiliş aparır. Hansı ki, kənd yolunda hər an qarşısına maneə çıxa bilər. O da təhlükəsizlik kəmərini taxmayıb.
Bununla öz "qəhrəmanlığını" nümayiş etdirən belə sürücülərin nə vaxtsa ağır qəza törədəcəyi qaçılmazdır. Çünki videodan da aydın olduğu kimi, sürücülərin fikri yolda yox, telefondadır və şou göstərirlər.
Ümid edirik ki, yol polisi bu sürücüləri tezliklə aşkar edəcək və əsl şounu onlara başa salacaq.
Qeyd edək ki, Avtosfer.az bütün sosial şəbəkələrdə bu cür şou göstərən hər bir sürücünü ifşa etmək üçün yeni kampaniyaya başlayıb. Bununla bağlı bizə dəstək olan hər kəsə öncədən təşəkkür edirik. Ümidvarıq ki, bu cür ictimai mübarizə üsulu nəticə verəcək və xəstə düşüncəli sürücülər özlərini yığışdıracaqlar. Onlar dərk etməlidir ki, avtomobil idarə edərkən bütün diqqət yolda olmalıdır, şou göstərmək üçün daha rahat yerlər var.

Elməddin Muradlı