"Ali və Nino" Nizami Gəncəvi, Nəsimi və Füzulini təhqir etdi: bayker, velosiperçi, qısa şalvarlı... - FOTO

Tanınmış kitab mağazası olan "Ali və Nino" öz "İnstagram" hesabında dahi azərbaycan klassikləri Nizami Gəncəvi və İmadəddin Nəsiminin kuriyer xidməti göstərən işçi kimi karikaturasını paylaşıb. Dahi Nizami Gəncəvi guya motosikletin yanında, ağzında qəlyan dayanıb və "Ali və Nino" mağazasının sifarişlərini çatdırır. İmadəddin Nəsimi isə bu işi velosipedlə görür. 

Bu il ölkəmizdə Nizami Gəncəvi ili elan olunub. Ötən il də Nəsimi ili idi. Ölkə rəhbərliyi səviyyəsində bu iki dahi şəxsiyyətin, Azərbaycan xalqının dəyərlərinin təbliği ilə bağlı geniş tədbirlər keçirildiyi halda mağazalar şəbəkəsi bu addımı atır. Yəni, dəyərlərimizi bu qədər aşağılamaq olarmı? İndi çıxıb açıqlama veriləcək ki, bu kreativ yanaşma idi. Bu cür kreativlik olmur.

Qeyd edək ki, eyni formada karikatura Məhəmməd Füzuli barəsində paylaşılıb. Guya məqsəd klassiklərin müasir dövrdə də yaşadılmasıdır. Amma deyəsən mağazalar şəbəkəsi dahiləri bununla ucuzlaşdırdığının fərqində deyil. Ümid edirik ki, bu kobud səhv tezliklə aradan qaldırılacaq və üzr istəniləcək. 

Orxan Əli