Dincəlməyə gedən ailə ağır qəzaya düşdü; 6 nəfər dünyasını dəyişdi - FOTOlar

Türkiyənin Balıkesir əyalətində minik avtomobilinin iştirakı ilə ağır yol qəzası baş verib. Avtosfer.az yerli KİV-ə istinadən xəbər verir ki, hadisə Kepsut rayonu ərazisində qeydə alınıb. Məlumata görə, 64 yaşlı Mustafa Bədii Hüseyinbaşoğlu idarə etdiyi 43 HP 003 qeydiyyat nömrə nişanlı “Renault” markalı avtomobillə, “Bağtepe” istiqamətində hərəkət olarkən, sükan idarə etməsini itirərək “Dursunbey” şosesi üzərində yerləşən körpünün təhlükəsizlik məhəccərlərinə çırpılıb. Zərbənin təsirindən nəqliyyat vasitəsi deformasiyaya uğrayıb.

Qəza nəticəsində avtomobildə olan bir ailən 6 üzvü dünyasını dəyişib.

Digər sürücülərin çağırışı ilə hadisə yerinə təcili tibbi yardım, xilasedici və polis əməkdaşları gəliblər.

Cəsədlər deformasiyaya uğramış nəqliyyat vasitəsindən çıxarılaraq aidiyyəti üzrə təhvil veriliblər.

Bildirilir ki, ailə Kütahyadan Balıkesirin Burhaniye rayonuna dincəlmək üçün gedirlərmiş.

Faktla bağlı araşdırmalara başlanılıb.

Namiq Musayev