Qızıl daşıyan zirehli maşın qəzaya uğradı: mühafizəçilər əllərində dırmıqla... - FOTO

Türkiyənin Çorum əyalətində qızıl daşıyan zirehli maşın qəzaya uğrayıb. Avtosfer.az yerli KİV-ə istinadən xəbər verir ki, hadisə Sungurlu rayonunda qeydə alınıb.

Məlumata görə, “Çorum-Sungurlu” şosesinin 5-ci kilometrliyində qızıl daşıyan zirehli maşın, sürücünün idarəetməsindən çıxaraq əvvəlcə elektrik dirəyinə çırpılıb, daha sonra isə tarlaya düşüb. Zərbənin təsirindən içərisindəki bir miqdar qızıl ətrafa dağılıb. Qəza nəticəsində maşının içərisində olan bir neçə mühafizəçi yüngül xəsarətlər alıblar. Zirehli maşın dərhal hadisə yerindən aparılaraq, ərazi təhlükəsizlik dairəsinə alınıb. 

Hadisə yerində olan təhlükəsizlik qüvvələrinin əməkdaşları, əllərində dırmıq, ot biçmə maşını və detektorlarla tarlada qızıl axtarmağa başlayıblar.

Faktla bağlı araşdırma aparılır.

Namiq Musayev