Skuterlər vətəndaşlara belə problem yaradır – Diqqətsizlik yoxsa, məcburiyyət? - FOTO

Paytaxtda skuterlə hərəkətə maraq artıb. Bir çoxları həm əyləncəli, həm də rahat olan bu nəqliyyat vasitəsindən tez-tez istifadə edir. Lakin bəziləri skuteri istifadə etdikdən sonra onları harada gəldi qoyub (atıb) gedir. Bu da yolu istifadə edənlər üçün problem yaradır.

Avtosfer.az xəbər verir ki, paytaxtın müxtəlif yerlərində bu kimi hallarla bağlı fotolar sosial şəbəkələrdə geniş müzakirəyə səbəb olub.

Belə ki, skuterlərin avtomobil parkinqində, səkinin və ya velozolağın ortasında, avtobus dayanacağında və.s yerlərdə park edilməsi sözügedən fotolarda aydın şəkildə əks olunub.

İndiyə kimi maşınların düzgün park edilməməsi ilə bağlı məsələlər gündəmdə idisə, görünür ki, artıq skuterlərlə bağlı da bu tip problemlər yaranmağa başlayıb. Skuterlər üçün dayanacaq probleminin olması danılmaz faktdır. Lakin bu onları vətəndaşlar üçün problem yaradacaq şəkildə saxlamağa bəhanə yaratmamalıdır. İstənilən nəqliyyat vasitəsini kimsəyə mane olmayacaq şəkildə park etmək isə həmişə mümkündür.

Məhəbbət Tərlanoğlu