Hibrid avtomobillərin satışında rekord – Ekspert çatışmazlıqlardan danışdı

Azərbaycana gətirilən hibrid avtomobillərin sayında rekord qeydə alınıb: 2025-ci ilin ilk 3 ayında 10 120 ədəd. Bu ötən ilin eyni dövrü ilə müqayisədə bu, 2,8 dəfə çoxdur. 2024-cü ilin ilk 3 ayında ölkəyə cəmi 3600 hibrid maşınlar gətirilmişdi. Ötən il hibrid maşınlar xaricdən gətirilən ümumi minik avtomobillərinin cəmi 20%-ini təşkil edildisə, indi bu rəqəm 48%-ə çatıb. Lakin hibridlər və elektromobillərlə bağlı bir sıra çətinliklər qalmaqdadır. Həmin maşınların alıcıları ehtiyat hissələrinin çatışmazlığı, şarjdoldurma məntəqələrinin azlığı və bacarıqlı təmirçilərin azlığı kimi məsələlərdən gileylənir.

Avtosfer.az-ın məlumatına görə, mövzu ilə bağlı "Yeni Sabah"a danışan nəqliyyateksperti Eldar Bəşirov bildirib ki, hibrid və elektormobillərin təmiri ilə bağlı peşə məktəblərində ixtisaslar yaradıla bilər:

“Hibird avtomobillər yerli bazarda artıq özünü sübut edib. Bu maşınlar ekoloji olaraq təmiz nəqliyyat vasitələri sayılır. Tələbat olduqca yüksəkdir. Onların təmirçilərinin çatışmazlığı həmin avtomobillərin ölkə bazarına təzə-təzə daxil olması ilə bağlıdır. Elm və Təhsil Nazirliyində məsələ qaldırmaq lazımdır ki, texniki-peşə məktəblərində hibrid və elektromobillərin təmiri üçün mütəxəssislər hazırlansın. Belə şagirdləri yetişdirə biləcək mütəxəssislər var”. 

Eldar Bəşirov bazarda ehtiyat hissələrinin kasadlığı məsələsinə də münasibət bildirib:

“Hələlik xaricdən edilən sifarişlər vasitəsi ilə bu problemi həll etmək olar. Zaman keçdikcə yerli bazarın özü bunu tənzimləyəcək. Bu, olduqca gəlirli sahədir. Elektomobillər və hibridlər bu günün və gələcəyin nəqliyyat vasitələridir”.