Abşeron Milli Parkına səfər edənlərin nəzərinə! - FOTO

Hava limanı yolunda, Qala və Zirə qəsəbələri ərazisində Abşeron Milli Parkına-Şahdilinə gedən yol istiqamətində 7 yeni məlumatverici- istiqamətverici nişan quraşdırılıb.

Bioloji Müxtəlifliyin Qorunması Xidmətinin rəisi Firuddin Əliyev Avtosfer.az-a  bildirib ki, ölkənin cənub-şərq hissəsində yerləşən Şahdilinə gedən istiqamətdə quraşdırılmış lövhələrdə ikonlardan istifadə olunmaqla təbiət ərazisinin xüsusiyyətləri, eləcə də parka  qədər olan məsafə əks olunub: “Müasir tələblərə, dünya standartlarına cavab verən məlumatverici nişanlar səyahətçilərin hərəkət, istiqamət, marşrut  müəyyənləşdirmə rahatlığını təmin edir”.

Xidmət rəsmisinin sözlərinə görə,  yol istiqamətləndirici belə məlumat nişanları növbəti mərhələlərdə Şirvan və Hirkan milli parklarını, sonra isə digər milli parkları əhatə edəcək. Bu da həm turistlərin rahatlığına, təhlükəsizliyinə, həm də ekoturizmin inkişafına töhfə verəcək.