“Bakı Metropoliteni”nin “Elmlər Akademiyası” stansiyasında sıxlıq yaşanıb.

Avtosfer.az xəbər verir ki, nəticədə sərnişinlərin stansiyaya daxil olmasında çətinlik yaranıb.

Məlumata görə, sıxlığın yaranma səbəbi stansiya qapılarında dayanan metropoliten əməkdaşlarının üzərində çanta olan şəxsləri sadəcə bir qapıdan daxil olmasına imkan yaratması olub.

Digər qapı çantasız şəxslər üçün nəzərdə tutulsa da, demək olar ki, əksəriyyətin işdən çıxma saatı olduğu və üzərində əşya daşıdığı üçün digər qapı işlək olmayıb.

Məsələyə münasibət bildirən “Bakı Metropoliteni” QSC-nin mətbuat katibi Bəxtiyar Məmmədov Oxu.Az-a açıqlamasında qeyd edib ki, sıxlıq platforma səviyyəsinin yüklənməməsi üçün görülən tədbirlə bağlıdır:

“Platforma səviyyəsində sərnişinlər yalnız qatara minib, qatardan düşür, stansiyanı tərk edib, stansiyaya daxil olurlar. O səviyyədə sərnişinlərin hərəkət imkanı məhduddur deyə platformanın yüklənməsinə imkan verilə bilməz. Bu səbəbdən gur saatlar əsas olmaqla gün ərzində stansiyanın platformaları xüsusi nəzarət altında saxlanılır. Metropolitendə ifrat dərəcədə sərnişinin platformaya daxil olmasına icazə vermək olmaz, bu qaçılmaz faciələrə gətirib çıxara bilər. Metropolitenin vəzifəsi sərnişini təhlükəsiz vəziyyətdə daşımaqdır. Əgər platforma səviyyəsində hər hansı sıxlıq müşahidə olunursa, onun ifrata varmaması üçün belə tədbirlərə əl atılır”.

Oxu.Az