Bu prospektdə 100-dən çox yağış barmaqlığı oğurlanıb; maşınlara ziyan dəyir - AÇIQLAMA

Son günlər sürücülər 8 Noyabr prospektində yağış barmaqlıqlarının yerində olmaması barədə şikayət edirlər. Avtosfer.az-a müraciət edən sürücülər bildirir ki, avtomobillər qəfildən həmin "lyuklara" düşür və ziyan çəkirlər. 

Məsələ ilə bağlı Avtosfer.az-ın sorğusuna cavab verən Azərbaycan Avtomobil Yolları Agentliyinin mətbuat xidmətinin rəhbəri Anar Nəcəfli bildirib ki, hadisədən xəbərdardırlar. "Bu barədə polisə də məlumat verilib. Yağış barmaqlıqlarını oğurlayıb 5-6 manata metal qəbulu yerlərinə satırlar. Dəfələrlə polis oğruları tutub. Amma yenə də bu əməllər davam edir."

Anar Nəcəfli bildirib ki, təkcə ötən il adıçəkilən prospektdən 100-dən çox yağış barmaqlığı oğurlanıb. "Şəhərin bir çox küçə və prospektlərində analoji vəziyyətlə qarşılaşırıq. Belə olduqda yeniləri sifariş verilir və 3-4 gün ərzində yerinə qoyulur. Ümumiyyətlə, bir çarə qalır ki, həmin qapaqları yerə zəncirləyəsən".

Orxan