Binəqədi şosesində aylarla davam edən qazıntı işləri nə vaxt yekunlaşacaq? - VİDEO

Binəqədi şosesində aylarla davam edən qazıntı və təmir işləri yolda hərəkəti çətinləşdirib. Avtosfer.az xəbər verir ki, xüsusən də günün pik saatlarında ərazidə uzun tıxac yaranır. Yaranan çətinlik ən çox da sürücüləri narahat edir. Onlar deyirlər ki, günün bütün saatlarında həmin yolda sıxlıq yaranır. Eyni zamanda, Avtomobil Yolları Dövlət Agentliyi və İri Şəhərlərin Birləşmiş Su Təchizatı Xidməti həmin yolda onlar tərəfindən heç bir işin icra edilməməsi ilə bağlı açıqlama yayıblar. Ərazidə çəkiliş zamanı məlum olub ki, həmin işi özəl şirkətlərdən biri aparır. Yaxınlıqda Mənzil İnşaatı Dövlət Agentliyinə məxsus yeni tikilən binalar üçün kanalizasiya xətləri çəkilir. İş icraçısı Sabir Mustafayev deyib ki, 4 kilometrdən çox ərazidə aparılan işlərin 90 faizi yekunlaşıb. Boruların çəkilməsi işi yekunlaşdıqdan sonra yol asfaltlanacaq və təxminən bir aya təhvil veriləcək.