Polis Bakıda avtobus sürücüsünün döyülməsi ilə bağlı araşdırma aparır.

Bu barədə Daxili İşlər Nazirliyinin (DİN) mətbuat xidmətindən bildirilib.

Məlumata görə, Sabunçu rayonunun Zabrat qəsəbə sakini Yaqub İbadov oktyabrın 12-də DİN-in “102” zəng mərkəzinə müraciət edərək sürücüsü olduğu avtobusda tanımadığı sərnişin tərəfindən döyülməsi barədə məlumat verib.

Sabunçu rayon Polis İdarəsinin 15-ci Polis Şöbəsinin əməkdaşları araşdırma zamanı müəyyən ediblər ki, həmin gün saat 20 radələrində avtobus sürücüsü Yaqub İbadov tanımadığı bir nəfər tərəfindən döyülüb.

Əməli törətmiş şəxsin müəyyən olunması üçün polis hadisə yerinə baxış keçirib. Zərərçəkən şəxsə məhkəmə tibbi ekspertizası təyin olunub. Hazırda sürücüyə qarşı zor tətbiq edən şəxsin müəyyən edilərək tapılması istiqamətində tədbirlər görülür.

18:14

Bakıda 204 nömrəli sərnişin avtobusuna dayanacaqdan kənarda minmək istəyən şəxs buna imkan yaratmadığı üçün sürücüyə xəsarət yetirib.

Bu barədə Bakı Şəhər İcra Hakimiyyəti başçısının tabeliyindəki Bakı Nəqliyyat Agentliyindən bildirilib.

Məlumata görə, hadisə ötən gün saat 20:14-də “Kənan-2000” MMC-nin istismarında olan müntəzəm marşrut xətti üzrə avtobusda baş verib. Belə ki, sürücü Yaqub İbadovun idarə etdiyi 90VF933 dövlət qeydiyyat nömrəli avtobus "Koroğlu" metrostansiyasından Ramana qəsəbəsi istiqamətində hərəkət edərkən 78 saylı məktəbin qarşısında 2 kişi və 1 qadın dayanacaqdan kənar avtobusa minmək istiyib. Amma sürücü avtobusu təyin olunmuş dayanacaqda saxlayıb. Vətəndaşlar sonradan avtobusa minərək dayanacaqdan kənar saxlamadığı üçün sürücü ilə mübahisə edib. Sonda şəxslərdən biri sürücüyə fiziki güc tətbiq edərək ona xəsarət yetirib.

Daşıyı hadisə barədə polisə müraciət edib və araşdırma aparılır.