Hərbi şirkətlər əməkdaşlarına Çin maşınlarında iş barədə danışmağı qadağan edib

Böyük Britaniyanın müdafiə şirkətləri sənaye casusluğunun qurbanı olmaq qorxusu fonunda işçilərinə yeni məhdudiyyətlər tətbiq edib.

Avtosfer.az-ın məlumatına görə, bu barədə “Report” “The Times” nəşrinə istinadən xəbər verir.

Qeyd olunub ki, bəzi hallarda təhlükəsizlik qaydalarına Çin istehsalı olan avtomobillərdə smartfonların USB portlarına qoşulmasına qadağa da daxildir. Britaniya silah istehsalçıları Çin texnologiyasının smartfonlara zərərli proqramların quraşdırılması üçün istifadə oluna biləcəyindən ehtiyat edirlər. Belə ki, Çin avtomobil sənayesinin məhsulları son vaxtlar ucuz elektrik avtomobillərinə artan tələbat səbəbindən xüsusi diqqəti cəlb edir.

Nəşrə Britaniya müdafiə sənayesindəki mənbə bildirib: “Təhlükəsizlik tədbirləri xeyli artırılıb. Şübhə yoxdur ki, Çin kəşfiyyatı çox fəaldır. Bildiyimə görə, Müdafiə Nazirliyi səviyyəsində Çin avtomobilləri və onlarda çoxlu sayda texnoloji elementlərlə bağlı narahatlıqlar diktə edən müəyyən işlər görülüb. Bir çox şirkətlər buna daha çox diqqət yetirməyə başlayıblar və təbii ki, məxfi xidmətlər də buna nəzarət edirlər”.

Məqaləyə görə, bəzi şirkətlər işçilərə Çin avtomobillərini korporativ dayanacaqlarda saxlamağı, orada olarkən iş məsələlərini müzakirə etməyi, USB kabellər və Bluetooth vasitəsilə smartfonlarını onlara qoşmağı qadağan edib. Britaniya şirkətləri ilə yanaşı, Amerikanın “Lockheed Martin” və Fransanın “Thales” şirkətləri İngiltərədəki zavodlarında təhlükəsizlik qaydalarını sərtləşdiriblər.