Sürücülərin NƏZƏRİNƏ: İşıqforlar bu cür işləyə bilər...

Dünyada yol hərəkətinin daha səmərəli təşkili üçün müasir işıqfor texnologiyaları, sensorlu və süni intellektlə idarə olunan sistemlər geniş şəkildə tətbiq edilir. Bu sistemlər avtomobil sıxlığını real vaxtda təhlil edərək hərəkətə uyğun işıq rejimini tənzimləyir.

Maraqlıdır, Azərbaycanda belə sistemlərin tətbiqi mümkündürmü?

Avtosfer.az-ın məlumatına görə, mövzu ilə bağlı "Konkret.az"a açıqlama verən nəqliyyat məsələləri üzrə ekspert Yasin Mustafayev bildirib ki, Azərbaycanda hələlik süni intellektlə işləyən işıqfor sistemi tətbiq olunmur.

Hazırda mövcud olan Nəqliyyatın intellektual idarəetmə sistemi vasitəsilə pik saatlarda işıqforların işinə müdaxilə edilir.

“Əsas küçə və prospektlərdə “yaşıl axın” anlayışı tətbiq olunur. Daha çox avtomobil hərəkət edən istiqamətlərdə işıqforlarda yaşıl işıq daha uzunmüddətli yanır. Bu isə hərəkətin təşkilində mühüm rol oynayır. Süni intellektlə də eyni prosesləri həyata keçirmək mümkündür və yaxın gələcəkdə bu texnologiyaların Azərbaycanda tətbiqi gözlənilir”, – deyə ekspert vurğulayıb.