Təltif olunanlar arasında həmin zabitlə gizir də var

Xəbər verdiyimiz kimi, Prezident İlham Əliyevin Sərəncamı ilə dövlət sərhədinin mühafizəsi üzrə xidməti vəzifələrinin icrası zamanı igidlik və mərdlik göstərmiş, hərbi hissə qarşısında qoyulmuş tapşırıqları icra edərkən vəzifə borcunu şərəflə yerinə yetirərək şəhid olmuş Azərbaycan Respublikası Dövlət Sərhəd Xidmətinin hərbi qulluqçuları ölümündən sonra təltif ediliblər.

Avtosfer.az unikal-a istinadən xəbər verir ki, baş leytenant Eyvazov Samir Elmar oğlu və gizir Alimov Fərid Elçin oğlu ölümündən sonra 3-cü dərəcəli "Vətənə xidmətə görə" ordeni ilə təltif olunublar.

Onların hər ikisi 2021-ci il mayın 15-də şəhid olublar. Belə ki, həmin gün saat 16:00 radələrində Dövlət Sərhəd Xidmətinin (DSX) Sərhəd Qoşunlarının “Göytəpə’” sərhəd dəstəsinin xidməti ərazisində Yardımlı rayonunun Gendərə kəndi yaxınlığındakı sərhəd zastavasının xidməti sahəsində 3 nəfər naməlum şəxsin dövlət sərhədini pozması aşkarlanıb. Sərhəd pozucuları sərhəd naryadının “Dayan” əmrinə tabe olmayıb, sərhəd naryadına qarşı odlu silahdan atəş açıb və əllərindəki yükü ataraq hadisə yerindən qaçmağa cəhd göstəriblər.

Sərhəd pozucularının açdıqları atəş nəticəsində baş leytenant Eyvazov Samir Elmar oğlu və gizir Alimov Fərid Elçin oğlu yaralanıblar. Hərbi qulluqçular dərhal tibb müəssisəsinə təxliyə ediliblər. Lakin onların həyatlarını xilas etmək mümkün olmayıb.