Tıxacda siqnal verməyə görə cərimə oluna bilərsiniz - Qanun nə deyir? - VİDEO

Ani diqqətsizlik, yaxud tıxacda hövsələsizliyiniz sizi 30 manatınızla vidalaşmağa məcbur edə bilər. Avtosfer.az xəbər verir ki, Oxu.az-ın "Qanun nə deyir?" adlı rubrikasının bugünkü mövzusu səs siqnallarından istifadə qaydalarıdır.

Səs siqnallarından harada və nə vaxt istifadə etmək olar?

"Yol hərəkəti haqqında" Qanunun 73-cü maddəsində qeyd olunur ki, səs siqnallarından yalnız aşağıdakı hallarda istifadə oluna bilər:

- yaşayış məntəqələrindən kənarda ötmə niyyəti haqqında başqa sürücüləri xəbərdar etmək üçün zəruri olan hallarda;

- yol-nəqliyyat hadisəsinin qarşısını almaq üçün.

Burada qeyd olunmalıdır ki, ötmə barədə xəbərdarlıq etmək üçün səs siqnalı əvəzinə (və ya onunla birlikdə) işıq siqnalı verilə bilər. Bu işıq siqnalı sutkanın işıqlı vaxtı - faraların işıqlarını qısamüddətli yandırıb-söndürməkdən, sutkanın qaranlıq vaxtı isə faraların yaxın işığını dəfələrlə uzaq işığa keçirməkdən ibarətdir.

Bəs bu qaydanı pozanları hansı cəza gözləyir?

İnzibati Xətalar Məcəlləsinin 329.3-cü maddəsində qeyd edilir ki, işıq cihazlarından və səs siqnallarından istifadə qaydalarını pozmağa görə sürücü otuz manat məbləğində cərimə edilir.