Yol polisindən yağmurlu hava ilə bağlı XƏBƏRDARLIQ

Bakı şəhər Dövlət Yol Polisi İdarəsi yağışlı hava şəraiti ilə əlaqədar hərəkət iştirakçılarına müraciət edib.

Bu barədə Bakı şəhər DYPİ-nin əməkdaşı, polis leytenantı Rüstəm Əhmədli Avtosfer.az-a bildirib:

"Hazırda müşahidə olunan yağmurlu hava şəraiti hərəkət iştirakçılarından yollarda daha diqqətli və məsuliyyətli olmağı tələb edir. 

Yağışlı hava şəraitində yol örtüyünün yaş olması və eniş-yoxuşlarda suların axması səbəbindən avtomobillərin sürüşmə ehtimalı yüksək olduğundan sürücülər yol və meteoroloji şəraiti nəzərə alaraq sürət həddini minimuma endirməli və kifayət qədər ara məsafəsi saxlamalıdırlar.

Yağışın yağması nəticəsində yolların bəzi yerlərində gölməçələrin yaranmasına görə sürücülər həmin ərazilərdən keçərkən elə sürət həddi seçməlidirlər ki, yağış suları səkilərdə hərəkət edən və ya yolu keçməkdə olan piyadalara, habelə binalara və başqa nəqliyyat vasitələrinə sıçramasın".